Хүний амьдралын хамгийн чухал хэрэгцээ бол орон байр гэдэгтэй хүн бүр санал нийлэх биз. Орон сууц худалдан авахад тавигддаг олон арван шаардлага байдаг ч ихэвчлэн байршлаас нь шалтгаалж сонгодог. Мэдээж чанар болоод байршил аль аль нь чухал асуудал юм.
Орон сууцны чанар
Өнөөдөр манайд орон сууц ны чанарыг барилгын гүйцэтгэгч компани, захиалагч талд даатгаад орхиж байгаа нь нууц биш. Үүнд төрийн төлөөллийн мэргэжлийн байгууллагаас гадна худалдан авч байгаа оршин суугч та бидний хувь оролцоо давхар хэрэгтэй байна. Хүн бүрт барилгын талаарх энгийн ойлгоц, анхан шатны мэдэгдэхүүн зайлшгүй хэрэгтэй бөгөөд бид хувцас худалдаж авахдаа чанар чансааг нь харж авдгийн адил, насан туршдаа амьдрах орон сууцыг сонгохдоо зөвхөн гадна үзэмж байршил зэргийг онцлолгүйгээр чанарын асуудлыг нэн түрүүнд харах нь чухал юм. Иймд иргэд захиалагч, гүйцэтгэгч компанитай гэрээ байгуулахдаа барилгын материал, үндсэн хийц, өрөө тасалгаануудад нарны гэрэл тусах байдал, агаар сэлгэлт, гадна тохижилт, дотоод засалд юу ашигласан, наад зах нь засал чимэглэлийн материал нь ямар улсад үйлдвэрлэсэн, эрүүл ахуйн шаардлага хангаж байгаа эсэхийг шалгаж үзэх нь чухал.
Агааржуулалтын систем маш чухал
Ариун цэврийн өрөө, гал тогоо зэрэгт агааржуулалтын систем зайлшгүй байх шаардлагатай. Бусад өрөөнд байвал бүр сайн.
Агааржуулагч сайн ажиллаж байгааг шалгах энгийн арга бол агааржуулалтын нүхний ойролцоо асаагуур, эсвэл цаас барьж салхи үлээж байгааг мэдэж болно. Энгийн хэрнээ чухал эдгээр хүчин зүйлүүдийг шалгаагүйгээс болж агааржуулагчгүй угаалгын өрөө, салхивчийн системгүй өрөө тасалгаануудад мөөгөнцөр үүсэх, цана цохих, чийгтэй, өвөлдөө хүйтэн байх нь элбэг.
Манайхан орон сууц худалдан авахдаа гадна талаас нь өнгөцхөн хараад, өрөө тасалгаагаар нь орж үзээд л болчихдог. Мэдээж шинэ барилга шинэ дээрээ сайхан л харагдана. “Царайны сайхнаар цай сүлдэггүй” гэгчээр хэдийгээр хотын төвд, м/кв нь өндөр үнэтэй байсан ч энэ нь сайн барилга гэсэн үг бас биш юм. Та байрандаа орлоо, ордероо нэр дээрээ болгож авлаа хэсэг хугацааны дараа өө сэв нь илрэнэ.
Харамсалтай нь худалдан авагчид чанар гэх чухал зүйлийг мартсанаас ихэвчлэн гомдлоо барагдуулж чадалгүй хохирч үлддэг. Иймд өөрийн гэсэн үл хөдлөх хөрөнгөтэй болох гэж буй иргэн та чанар, байршил, ирээдүйн үнэлгээ зэрэг бүхий л зүйлийг нарийвчлан судалж байж, амьдрах орчноо сонгох нь хожим харамсах зүйлд хүргэхгүй байх болно.
